الأربعاء، 21 يناير، 2015

حْلاوتُو ف لمرورة

حْلاوتُو ف لمرورة
غمزات مرورة ليَّام شهد الحب
زاغ عل جْبَحْ
وف فم قلبي تعصر ..
الحملة جات وجابت حب وتبن
شفت الريح طيرات وراق التوت
عرات كسدة الثقة عظم ٬وْراَعظم:
الشهد صبح ضركة و كلها شوك ..
كَحْلَتْ بالعْمى
ودلاَّت على همي رجليها
آه كن شافت بين الضلفة والضلفة !
كن بانت لها ولفة ٬
لهفة،
و بحور شوق ..
جاتني مابين الضركة والضركة
ضربة ف الصدر
ضربة ف الظهر
وضربات تشعل مجامر الضر ..
يلاعطيتها بالظهر
باش نْبَرّد حر الضربة
تتحير ..ترخي ف ياَّمي سم الجدبة
وتحكي وتصر حسايفها فيا ..
ويلا عطيتها بالوجه تشرطو
باش ما يبقى عندي وجه ل شهد حب..
مافادني غ نسرجني ونمشي ف طريق الصبر
نحني الظهر نزيدني ضبرة على ضبرة
و نبقى مرا
هازا همي ف الصدر
وتهزني هوايش الحب
تدفني بين ضلوعي ،
ف تراب رجوعي ليا
و وجاعي فيا
نفتح كناش الصبر
نتعلم ونعيد حرايب الضر
للي شق تراب العمر
و سقاني المر
راسي يا راس لمحاين
سعدك من أول حب باين..!
يا كل من عشق وحب
يلا سما الحب ف يوم غامت
وصبات
راها ف رمشة عين
تندم وتسحى.
وها وجهي وها أنا
يلا سما الحب صفات ..!
حيت الحب جغمة ،
نغمة ،
وبسمة،
وتشهاوها كاع البنات.

ليست هناك تعليقات:

إرسال تعليق