الجمعة، 16 يناير 2015

بين لودن ...وللسان



بين لودن ...وللسان

بين لودن ...وللسان
ولد زمان حريفاتو
خرق... وقمط ... حمل ...و رارا ...
حْبَات  لحريفات...
وخطات وّلْ خطواتها
نسجات كبة لكلام وّل الكلمات
صبحت لْوْدَنْ عْبَيّد
يعمر شْواري و يْنقّل
يا لودن
ياللي ف راس الكسدة ساكنة
شفتك حْمْلَة  ...
جايا و جايبة... هْدِيَّة  ل للسان
داك لعمود الواقف ف باب الدرب و يتلفت
حاضي كلامو الطالح يدفن الصالح
دفنو ف زحام لكلام...
ودنيه منجل يحصد لكلام لخضر واليابس
عينيه ف حْلاوة لهدية فالتين
نيفو سابقو ما تقول غير كلب رْيُوكُو سايلين
لقّط من لهدية سرب كلام
هزو حامي وحطو ف راس الدرب
لبسوه الغافلين قياس
شحال عراو من ساس
وشتتو حلام ناس ...
شمو النيف للي تّحْرم من كيفو
وجاتو  الحملة  حاملة …تتوجع
حامية لكلام بسيوف لوجع
حط ...حط  ...حط
حط ما نفحتي
هدا ماشي كيف
هدا كلام ف كرشي ضيف
عْطس ... عْطس ...كبة لملام .

وبقات اللعبة  دايرة بين  لودن وللسان  ...

ليست هناك تعليقات:

إرسال تعليق