الدنيا زوينَه
الدنيا زوينة و عشاقها مساكين
ريحت الأنوثة والفتنة منها فايحين
خلق الله ناس ليها قياس
وقليل منهم ليها عارفين
تابعينها كيف لعمى ف الظلمة
تابعينها و حْلامهم سايلين ..
***
الدنيا زوينة و عشاقها مساكين
***
ناقصها من الأمومة غير تكون وَدود...
هي و الزمان زوج وجوه متحانين ...
كل وجه يقلب على خوه *
الدنيا زوينة و عشاقها مساكين
***
كلهم ف هواها متنافسين
فطماتهم قبل الوقت
وخا نْهودها ب الحليب سايلين
اليوم بحال البارح
بحلامهم ضاقت
صبح حليبها نصه قطران و نصه زفت
نتفتهم من طريقها نْتيف اللَّفت
الدنيا زوينة و عشاقها مساكين
***
وخا هما ف عينيها صغا ر ، كبروا قبل الوقت
علمتهم يحلموا ف ضو النهار
وحلم نهار ، ضحكة للصغار و الكبار
الدنيا زوينة و عشاقها مساكين
***
تعلموا يلبسوا كل يوم لون
يوم صِدق وخا يطيبوا جنابهم بالدق
ويوم نفاق
يبوسوا الراس و الرجلين
المهم لاصقين..لاصقين
يوم متكبرين ،على التواضع ما صابرين
ويوم متواضعين ، يقولوا حنا على قدنا لابسين
الدنيا زوينة وعشاقها مساكين...
ليست هناك تعليقات:
إرسال تعليق