وْنيسَهْ

وْنيسَهْ

حاولت ن طِيرْ 
نوصل لك،نْتْوْنَّسْ بيك ...

 كل مَرَّهْ  طرت وتْْعلّىيت

بنفس السرعة باش طرت

نزلت

وتْدلّييت

شديت ف شوي د الزهر

بقيت كَْنعافرْ,كَْنعافرْ

وجييت عل زنافر ...

سباب الهم

سباب الهم 

قلت للقلب

سد بوابك تلقى ما تحل

يلى كنتي  بلى بواب

ترتع فيك الحمير و الكلاب 
يكتر فيك الشهيق والنهيق 
وتلف الطريق

تولي سوق  
يدخلك السباغ والدباغ

للي شرى وللي كاع  ما باع

هذا يدق الوتاد

وهذا يوقف خيامه بعواد

وهذا يلعب دور الجلاد  

سد بوابك تلقى ما تحل 

/// 

قالوا للقلب منين جاتك العافية؟

قالهم من عيني

دير لعينك لجام وقصر الحبل  

بعد القصعة للي منها ليك  تلكم

///

يا ديك لميمَه

يا ديك لميمَه  

  

حالت بيني وبينك مسافات

اتمنيت انجيك ونحيي اللي فات

انفتحواكتاب الذكريات

نتفكروا اجدودنا ارجال و عيالات

وبلادنا 

 ابلاد لقفاطن والدراعيات

نتفكرو ازمان الظلم والقهر

وازمان النساء المناضلات

نجوى

نجوى  

خليني ف عيونك خليني

من شوفتك لا تعفيني

سلامك من بعيد يجيني

يذكرني بحبي وحنيني

يركبني جناح الحلم ويديني

ينسيني ألمي وأنيني

عيونك بحر

ولفوني السهر

ثورة قلب

ثورة قلب

كان بلاد عشبها كثير

بلاد الحب والخير

ف يوم ركبو الهم

وصبح كيتألم

حط يدو على تاجو وتأمل

قال : يا راسي شنو ذنبي؟

كل من اُعشق

بسهامو يرشق قلبي؟

يتمتع ب حبابو ويدمي جلدي

ترجل وسحب منو كل نبل

نسى كل ملام

ومتنع على كل تهام

رأس الشوف

رأس الشوف 

جابت لمطرقه

خبار المسمار لمطرق ف جبهتي

عين شوافة...

هموم قلبي تشوف

ف جبل الدات حافره كهف

رموشك سايله شلال

مَتْوَاضعه ...

ما ّطمعي تسكني ف سما (ء)نَجْمه

يركع رمشك للتراب

كِ سبوله العامره

و سبوله الفارغه نيفها ف سماء

قْطَفْتْ كَمشه من شوفي

قَطَعْته غَمْزات

عجنته من جديد

هديته ل القلوب للي عْمات

يا لؤلؤه ...

يا حَبَّتْ تبروري كَحْلُوك ذنوب العباد

مجدافك رموش

غضبك دموع

ما(ء)ك عْمَى

وْجعك عْمَشْ

بيبانك بلا بواب

نتفي جْلالتك ...

شبعي شوفك مني

غزلي من رموشي ليك حْجاب

ستري عيبك و عيبي

شيطي كُبَّتْ خيوط

ربطي قلبي حداك

القلب السايب

سباب المْصايب

خليك ف دواخلي

ف بحرك نلقاني

نشوف الدنيا بيك...

معاك...

و فيك...

ما تخلعك جلاله

لعمى عمى القلوب

قَطّعْتْ شوفي غَمْزات

و شكون يفهم غمزاتي؟

يَاكْ الشوف الَمْطَرَّزْ ب المعنى

عْطى ب لَقْفَا

طَّرَّقْ مسماره ف الرُّكْنه

وْ علَّقنا عليه حوايج كْثيره طاحت من شوفنا

فين الشوفه لحكيمه

للي توقف لكلام ف شوارع للسان؟

تلبسها دْفينت المعنى

ترقصها على حبال الشوف

و تصب شتا(ء)العين شلا شوفات

وَارَاكْ لْ لَفْراجه :

هاذي من نوع الحر بالغمزه

ماشي غمزة وصل بين شوف و شوفه

هي غمزة فصل بين كلام و مقام

و هاذي شوفه جايا و جايبه ...

جايبه براد مْنعنع بالحكمه

و سط الصينيه مْربع

ضَايْرِين به عْبِيد ف كل اللوان

و هاذي شوكت حسد

مدقوقه ف حزامي

تسهرني الليل

و تشربني من كيسان الحمى

سرحت عيني ف الوقت

بان لي الشوف حْوَالْ

ولَبْسَتْ عينه أَحْوَال :

شوفة للقلب مرسال

تعصره عْصِير الصوف

شوفه سايله من ذاك الشلال

ملحفه ب لباس الحياء

شايفه شوفت الخطفه

ما تشعل نار الجوف

ما تبرد صهد الشوف

شوفه تابعه شوفه

عاطياني ب لَقْفَا

يا أنا...عْيَالي الشوف

ياراسي شوف ...تشوف

ياك ما مْخبي عْلِيَّا شي ...شوف؟

حلف بالعين السايله من كهفه

ما قصر من جهدو

قلت نشوف عيني

ياك ما شايفه لها شي شوفة؟

لقيتها رسلت الشوف مرسال

بقى غادي و ينقص

ما وصل للمراد

حتي بقى فيه النص

تْسَلْفَتْ من يامي غمزات

نغرف من وْ جِبات الوقت

يَاكْ الوقت غير وجبات

ساعه معاك

و ساعه ضدك

سيف الوقت

سيف الوقت 

بكمشة من هاذ الليد

شديت وقتي نعجنه من جديد

الوقت ثابت

يمكن يخرج مني

يمكن نزرعه

يخرج مني فالت

عقارب سوايعه

محققا على نغمات هواه

بغيته غدا إلا طفات الشَّمس

و غرقت ف بحر عيوني

يغرق ف ظلام روحي

يتكمط ف بردها

---

يبقى معلق بين ليلي و نهاري

نتفرج عليه كيموت ليه لكروح

مابغيته يحضيني

ف هروبي مني و رجوعي ليَّ

ما بغيته يزحمني إلا فقت

و فيقت الزمان الراكد فيَّ...

بغيته يرحمني من خْليقة العساس

اللي مطرق مسامره ف ظل ذاتي

وقت ما فرَّطْتْ

تكرطني عقاربه ب سمها

و يسرح معايا الوقت ك الموت

نتعكز على ظلي و نوقف

نتحتت معاه كيف ننقص من طوله...؟

كيف نحفر على ريحة البركة ...

إلا بقات ف جذوره ؟ !

كيف نزرعه حسن نية ...

و كيف نحصده تدبير لليامي الجاية؟

حار تخمامي و مشيت ليه

كان واقف على راس ساعة

ك يمضي سيفه

عييت نحوم عليه

مرة نغمزه مرة نمعني عليه

ما حتتني ما عطاني جواب

تجبرت و طغيت

قطعت راسي و رميته

قلت ندير... مادار حد :

ن قاطعو...

نْقَطْعو ...

نقطع ليه...

يقطع لي

قطع رجايا

قطع ظلي من داتي

دخل سيفو لجواه

وسلني مني

ْعصر ظلي

نشره تحت رموش الشمش

غزلات ليا لباس

كحل من ظلام شعري

عرفت راسي غاديا غاديا

حلفت ما نمشي حتى خير نفعل :

قلت ل للي تْحَشْ ب سيفه

وما حس ي فيق

للي زرع وقت وحصد شوك

يقْلب حَرْته

للي قتل الوقت

يوجد دِيَّته

للي قهره

يوجد حمِيْته

للي هبل ليه

يتلفه ولا يْوَلْفه

سمعني ونشر ظلي تحت رموش الشوف

غزلات رموش من صبري قصايد تهدر ...

فيْق حالي دوك النايمين

للي على حْقيقت الوقت غافلين

فاق كلي من غيبته

شم ظلي وعرفه

لبسه ومشى يجري

تعثر ف شوك وحجر

تجرح وسال منه شلا صبر

جاه زهر كيتعتر

قال ليه :

شوفني, ياك أنا زهر

كن كان عندي زهر ما نتقطر

شد معايا الوقت من الساعة للي ضاراه

نقطعوها ويبقى وقتنا هاني

نطفيوا دوك ضواو

الشاعلين ف البال من زمان الوقت...

يمكن غدا يشعل ضو جديد ف ظلمة ذ الزفت

ونلقاني فقت من عْصير الوقت

و نقطعو ما يقطعني

طْلوع الروح

طْلوع الروح

قلت نرتاح شويه

توسدت ْعَياَيا

تّكِّيت...

ضاقت نفسي

قالت /

ها نتي ْمتَكْيا

نخرج شويا

نجر رجليا

نشم نسمة حية

طالت الغيبه

َحنَّت ْالروح ليا

بغات ترجع

تَلْفَات طريق

وبقات تايهه ف ملك الله

كَرْمْتْ داتي

صبحت وْكِيَده

جِيفَه  ...

ماتسوى صولدي

حَنْ  فْياقي ل ديك الروح

تسالاو منه لكروح

فيقني ...

طار نعاسي

ورجعت ليا الروح

حيرة ليلي

حيرة ليلي 

مالك ياليلي حاير؟

واش راك بحالي

ب جمرالوحده و ظلام مكوي؟

ياك سلهامك مطرَّزْ ب نجوم

ضاويه تونس القنطان

غير ب همسه منك

يجيك ضو الكمره

و يلبسك بياضو مْهابَه

أما دابا

راه نهارك بان

سلخ حيرتك...

لبس سلهام الصبح

و جيني فايق

فيق لي داك الراس

يتسلغى ل كلامي

تونس بيا و بيه

ولا تلوم فعالي

وْعود لقلم

وْعود لقلم

حق من خلق الكون

بين الكاف والنون

ما ندخل جوايا

ما يهداو لي جنون

حتي نفرغ كرشي

من عرام د لكلام ...

ن خلصك من هم كاتم نفسك

مخيب ليك زمان

ما تقول غير

حملَه قاطعَه طريقك ويدان

هم مْطِيَّرْ نعاسك من وَكرو

مكحل حلامك بْ عْماه

عَاصْرْ دمك من ماه

نشق لحروفك ف الما طريق

و تجري على لسانك الحكمة

ياك ف جوفك اُحلام...

ساجناها ليام

وشكون يحررها

من داك لمقام

غير قلم بحالي

راخي سوالف جدبَه

حامل هم الكلمة...

ڭلَّتْ مدادو

يلا شربتها الكلمة

تتحول هم

و يلا خوات ما تعمر ما ...

أنا خاتم الحكمة

وانا كاتب الكلمة

انا محرر لحلام من سجن الهم

وانا كاتب الحكمة