الخميس، 23 فبراير 2017

بغيتو يشاورني


 بغيتو يشاورني
بغيت قلبي يشاورني يلا حب
يصنع من تاجو ساس متين
ما يبني حْيوطو عل لهوى
و ف غيس الحب تهوى
بغيتو يلا حب
يحب ويقيس
يبقى راجل شاد ف تاجو
تبقى دقاتو مضبوطة على هْوايا
عمرت ليه كاس ...قلت ليه :
شرب...شْرب حظك
و انْتَ و زَهْرك ...
جرَّب...
القلب للي ما يحب ميت
يقتل كل حي ب دم بارد
حلال تْرْبْيَة فيه تْعاود
يحيي موتو ب حْصاد دْنوب
يعصر شجرة الحقد
و يسقيها ل لَّقلوب
وما يدوق طعم الحب
كاس حبو ديما عامر
يعيفو ليه الخاطر
كاس كرهو
عمرو ما يعمر
يقطرو قطرة قطرة ف كل شْبر
من حقدو رجع بَكْمَة
يجري ف عروقو الماَ
ويلا ما خفت نكتب …
راه غير دمو نيت وْ رجع مَا'ء'
والقلب ما يْحْيِيه ماَ
والدم ما تْغَمْسُو نَعْمَه
قلبي عاشر خَلْوَة ظلامي
دَّا وْجاب ف كلامي
وحتى يوم ما جْرَحْتو بملام
حلمت و ساريتو كل حلامي
فَصَّل لِياَّ حلام خْرَى
على قياس وهامي
مَدْ عروقو ل داتي سواقي
ونبتت ف جنابو حْياتي
شحال دَّات ف ليام وْ جابت
تَّكَّات على سلسولها لمَقْوّس من تْقُل لِيَّام
ودَدْشَات على عمود خيالها المحروق ب صهد الوقت
جايا جارا خيالها عريان ...
حشمانة من قلبي
رمقها وحنا راسو قال :آش هاد لعجب؟ !
لوجه علاش تحشمي راه مشروك
قلت :يا قلبي
يلا ما بقى ما يعجب
نتفني من جنابك
وقْلَبْ...
قلب عليا وعلى يامي
وقف حاير ف باب داتي للي كتدي ما تجيب
شَيّْر عليه واحد العاشق ب نْبْلْ
حط يدو على تاجو وبدا يتوجع
قال : يا راسي شنو ذنبي؟
كل من عْشَق ب سْهامو يَرْشَقني ؟
يتمتع ب حبابو و يسيح دمي
علاش الحب ولاَّ ضَرْكة كلها شوك؟
ترجل وسحب منو كل نبل
و قرر يخيط للعشاق ثوب
على قياسهم وب شر فعالهم
شَرَّحْ راسو وملحو
و قدام العشاق نشرو
دعا فيه دعوة نْصَاصْ
سير يا قلبي ...
بغيتك
عمرك ما ينبت فيه حب ولا إحساس

طالب ضيافة المعنى



طالب ضيافة المعنى
مجمعنا حديثه معنى
يغزل من رموشنا كبة الكلمة
تحير فيها صنعة لمغازل
يلبسها لسان الحكمة
يشرڭ
 ب موسها كرش لعقول البكمة
يفجر عيون لكلام
وللي ما جرب
يطرز على وجه الكلمة نغمة
بمرمة لحروف
ما ينسج زربية ما يقرشل صوف
قال الزجال لحكيم :
شفتك جاي و جار...
حروفك تحبو ف باب الدار
ت خرق و ترضع و تعطيني نراري
مجمعنا مجمع عرارم لكلام
للي عشقو ما يتلام...
جمع جموعنا ولا فارق مجمعنا
سول يلا حار ليك التسوال
انت دكي ما تعدم جواب ل لمقال
ياك لسانك حصانك
لجمو ب حلامك
سرجو بفهامك
ْْوقَّر قرانك
وعوم ف بحور كلامك
لبست رجليا
سرجت لساني
ودخلت مجمع لكلام
قريت سلام
قلت جيت طالب ضيافة المعنى
قبلني شيخ لفهام
نصلت رجليا
توضيت حريفات
كسبت ف خضورُه
شي فهامات
لجم لساني بلجام نغامو
تبورشت
وجاني حالي ...
رخا لساني سوالف جدبة
وقال :يا صلاح مجمع لكلام
جيتكم ف وجه الفراهيدي مول لقوافي
جيت ف وجه بحورو الكاملة
ووتادو الغارقة ف جدر خيامو
صلحو ب فهامكم عيوب مدادي
ودار لكلام ...وجات لحلام...
صنعت من ضلوع لساني مركب
ركبت بحور لكلام ...
مازلت ما تقنت الحبكة
رميت ف ديك لبحور الشبكة
وقلت :
يا فتاح يا عليم
يا رزاق يا كريم
لا تلومني بملام
لا تجرحني بكلام
دابا نصنع صنعتكم
نعوم ف بحركم
نجمع جموعكم
وما نفارق مجمعكم
وقال :يا صلاح مجمع لكلام
جيتكم ف وجه الفراهيدي مول لقوافي
جيت ف وجه بحورو الكاملة
ووتادو الغارقة ف جدر خيامو
صلحو ب فهامكم عيوب مدادي
ودار لكلام ...وجات لحلام...
صنعت من ضلوع لساني مركب
ركبت بحور لكلام ...
مازلت ما تقنت الحبكة
رميت ف ديك لبحور الشبكة
وقلت :
يا فتاح يا عليم
يا رزاق يا كريم
لا تلومني بملام
لا تجرحني بكلام
دابا نصنع صنعتكم
نعوم ف بحركم
نجمع جموعكم
وما نفارق مجمعكم


أنا وروحي


أنا وروحي

غمزت الروح للدَّات
و ف ظلمتها ولدوني
بغيت ندخل سوق راسي
قلت :نسول واش أنا كاين بعدا
ولا غير روح لا بسة دات
طليت على راسي من راس الشوف
شفتني كاين متونس ب جروحي
شفتها قياس الشوف عليها
ك المنشار
طالعة تاكل مني لڭروح
نازلة تحفر فيا لجروح
َك ْتفْلِي ذاتي نظرة نظرة
تحفر على جدور الحكْرة
تشوف عرام هنا ...عرام لهيه
وهدا يلاهيك هنا
وداك يلاهيك لهيه
باش ينسيك الحكرة ...
الحكرة تّنْسى ليه
ما تَّنْسى ليِاَّ
حيت كرشو عامرة صيف وليالي
يهزني الشوق ليا
نهلل ف سكوت :
روحي يا روحي ما منك زُوجْ
لا تْروحي و تخليني
ْتمنيت نصور مَنّك نُسَخْ
فين ما خرجت روح
نزرع ف مْكَانَك روح
أنا هناكاعد بيك ...
معاك...
و ليك...
خلينا هنا معاشرين
انتِ ماصالحة غير لِيَا
ولاَّ للدْفِينْ
خلق الله عرضك وطولك ليا قياس
و دْفِينْتي حْسن ليك
لبسيها...
علقي همومك فيك
ف مسمارك للي طرّقت ف داتي
تحزمي بيا 
ديري  ما دارت القرعة مع الفقوس 
تعلمي تقطعي الواد وما يتبللو رجليك
يَاكْ للي ما خرج من واد القرعة
ما خرج من عقايبها؟
شطحي لِيَا ...
ركزي على قعدة زمان الحامية
و لا تتسناي غيري يبرد غدايدك
يا روحي...
حَرْتِيني صبر
زرعيني تْفكير وتدبير
و لا تهدي خيرك للغير
هذا قلبي ليك عْشيق
هذا نبضي ليك ْصديق
ها شوفي ليك... رمشو سخون
يْدْفّي عراك
يستر عيوب للي لابْساك
ها تابوت عظامي ليك مسكن
ظلامو رحمة و ترابو مسك
تابوت الدنيا
كلام وروح هايمة ف بحور لحلام
و تابوت الحق
شاهْد ...ظلمة ...ضيق ...
خلينا يا روحي
ف عرصة لحلام الفانية سارحين
حتى يسقينا م الموت ساقيها
و نْشْري ف الجنة دار دايمة نسكنها
ب ركعة ف ظلام الروح نصليها
روحي يا روحي و فين تروحي؟
بلا بيك الدات جيفة ...
سَوّسْ عظامها مسمار الموت
آجي نتلاهاو
ب كُبة الوقت لمخبلة
نْفَكوها على نغمة العيشة لهشيشة
ولا زربة على موت
مال لونك مخطوف ؟
ما تكحل العين بيك الشوف
ما تنشرك مرايتي على وجهها حروف
شوفي ف شوفتك عمى ليه الشوف
لبستيني قياس
ذاب ف نقرتك نحْاس
كيهزني الشوق لدواخلي
نجي جارّك ف خيالي
نجي نتمسح ب عْتابك
نْسَقسي عْلِيا فِيا
شحال من ْمكان
انتِ فيه حاضرة وَ نا غايب
حتى شَكّيت واش أنا كاين
مالي ومال الشك ؟أنا كاين كاين ...
يا ْولْفِي خلي عام يلوحنا ل عوام
نزرعو الوقت فرحة و نحصدوه خير...
مَزْود الهم يخفاف حملو ع لكتاف
شنو تحت راسك يا روحي؟ !
عنداك تسقيني الموت من تحت راسك؟ !
عنداك تسقيني تخت كاسك ؟ !
سمعت سْكات بْلع لسانو
سَرّحت الشوف ف روحي
دْخَلْت ل دواخلي و بديت نطوف
بانت لي الروح تْقَطّع الروح
خْيالي حداها مشبوح
الموت عند رجليها يفتل لكفن من كبة الشوف
و جات السَّكْرَة... عَصْرَت من قنطار الموت قطرة
غمزت لِيَا الروح باش نفهم البوح
قالت :ف خاطر لمحبة ساعة طلوع الروح
هبطي مني ...شدي فِيَا و سمعي ليا
ما نخليك ورايا وخا تبقى فيا غ الروح
لْبْسْني هَمّ كْحل من شعري
ضْوَا ف وجهي بياض
بْيَض من وجه الميت
نَدْبَات الدات فراق الروح
لسانها نطق ب حكمة صبر :
طْريق طريقنا و لازم نركبوه
والأمانة أمانة الله ولازم نردوها ...
يادوك الشامتين
ل موتي فرحانين
عَقْلو هبالكم
لا تقولو جيت ف وقت الموت
شربني كاس الوقت
وخَلاّ التخت ...ليكم ل تحت