الجمعة، 16 يناير، 2015

الخدمة


الخدمة
كنت بْحال كل بنت ف سني

تَ نحلم حْلام وردية
حيت ماتَنمْلَكْ غير هيَ

حْلامي كانت لي عُكاز طريق
كانت لي لْحْبيب وصْديق

وخا الفقر تا يقهر 
وخَّا مذاقو مُرْ

لْحَستو


ْتقنت صنعة بلادي  
حيت الصنعة  يلا ما غنات تستر

ْبدعت ف الجلابة والقفطان 
.حرفة وْرتْها على جدادي 

مديت يدي للحنة 
بغيت نولد ولادي

كانت بداية جميلة 
.نحلم بها كل ليلة
لكن عمر الباكور غير سبعْ يام  
والكرمة تتْخرفْ ف باقي ليام.

كان الراجل خدام و مع ليام…

هجر فارس لحلام حصانو و نام

قلت خليه السعادة ساكناه
.لكن نعاس طول 
والمش تا يموت نهار للوّلْ

ف يوم قررت نقلقل السوق 
نفتح صفحة الحقوق
قلت ليه يا راجل فيق نعاسك  
جر القفة للسوق

اُجمع الوقفة و ترجل وقال :

ما عندي ليك لا حل ولا حقوق 
ردي بالك من العقوق

راني ندير لك ف راسك القوق

مديت يدي لفراشو
جريت لملايَه على راسو

قال لي نعاسو:

خليه ما فازوا غير النايمين
وللي بغا يربح العام طويل
مرت ليام و لعوام
و ف يوم فيق نعاسو..

قلت ألله الراجل فْهم راسو

جاب قهوة ف كاسو

حط ورقة وقلم

كتب  كلام يلا خالفتو سناني يتساسو

قال  :

أنا باسو  للي طار ليه نعاسو

اليوم غادي يخدم يكلس معاك

حتى يطلع لك ف الراس كلاسو

يحدد الثمن مع الناس

يلهف للي باين و يخلي لك غير لمحاين

هدا هو ثمن نعاس و فيقي نعاسك يابنت الناس

صبحت نخدم و نعطيه

راسي بين كتافي وحل

وبديت نقلب على الحل

لكن الحل كان سْراب

طريقو طويلة

كل ما قربت ليه يرحل

طرقت بواب كثيرة :

آش من جمعيات نسوية
ْو آش من محكمات ؟!

شكيت و قلت:  ما كيضربني
ما ساس لي ضروس.. غير فنيان.. و كيدي لي لفلوس
حكم القانون بالحق

حكم و وجد لي الحل

لكن الحل مسكين ماعندو زهر بحالي

ف حلق القاضي وحل

و شكون يجيبو ليا؟

عييت نصبر ليه

تمنيت ف يوم تجي حملة و تديه

غادي نبكي عليه

لكن ضروري نردها ليه

ونهار الواد  يرميه  ويديوني ليه

ندي سحارة ف يدي

تفتل كسكسو بيديه

والقلم للي ياما سرق فلوسي به

يكتب لي عتراف  ب ضلمو وقهرو

ندسو تحتي حتى لْ يوم القيامة لله نشكي به

ساعتها ما يقدر ينكر
هدا عْترافو ب خط يديه.



ليست هناك تعليقات:

إرسال تعليق